شوہر جب گھر سے باہر قدم رکھتے ہیں تو راستے میں بِل بورڈز پر مسکراتی لڑکیوں پر نظر پڑتی ہے ، آفس داخل ہوتے ہی ریسیپشن سے ایک مسکراتا ہوا سلام استقبال کرتا ہے ، سارا دن سجی سنوری خوش اخلاقی کا مظاہرہ کرتی کولیگز کے ساتھ گزرتا ہے ۔ فیس بک آن کریں تو وہاں بھی مسکراہٹیں ، لیکن گھر کر اندر آتے ہی بیوی پر نظر پڑتی ہے جو کسی اور کام میں مشغول دور سے ہی سلام کر دیتی ہے ، مسکراہٹ تو دور کی بات ، پاس بھی کم ہی آتی ہے ۔
آپ نے سب سے پہلی تبدیلی تو یہ لے کر آنی ہے کہ میاں کو اچھے طریقے سے ویلکم کریں ۔ نہیں بھی دل کر رہا تو بھی مسکرا دیں ۔
دوسری چیز یہ کہ شوہر کے آنے سے دس منٹ پہلے خود کو فریش کر لیں ، شاور کا ٹائم نہیں تو کپڑے بدل لیں تاکہ بھنے مصالحے اور لہسن کے تڑکے کی بو آپ سے نہ آ رہی ہو ۔ نیچرل سی لپ سٹک ، کاجل ، ہلکا سا پرفیوم ، بس اتنا ہی ! دوسرے سے زیادہ آپ کو خود اپنا آپ اتنا اچھا لگے گا کہ مسکرانا مزید آسان ہو جائے گا ۔
بہت پہلے کسی نے کہا تھا کہ بیوی کو محبت اور شوہر کو عزت چاہیے ہوتی ہے ، یہ ملتی رہے تو شادی شدہ زندگی خوشگوار گزرتی ہے ۔ مجھے یہ لگتا ہے کہ دونوں کو دونوں ہی چیزیں چاہیئں ۔ بیوی کو بھی عزت ملنی چاہیے اور شوہر سے بھی محبت کا اظہار ہونا چاہیے ۔ دوسرے کو بدلنا چونکہ ہمارے اختیار میں نہیں لہذا فی الحال سارا فوکس ہم اپنی ذات پر کریں ۔ شوہر کو عزت بھی دیں اور محبت بھی ۔ اس کو کھانا دے دینا ، کپڑے استری کر دینا ہی کافی نہیں ، آگے بڑھ کر اور کھل کر محبت کا اظہار کریں ۔
یہ تو تھے فوری کرنے والے آسان کام ۔ اب آئیں کچھ ایسی عادتوں کی طرف جس سے شوہر سخت کوفت کھاتے ہیں اور عورتیں بالکل باز نہیں آتیں ۔
سب سے پہلی بات تو یہ کہ ہر وقت کے طعنے دینا !!چھوٹی موٹی باتوں کو جانے دیا کریں ۔ ہر بات پر محاذ کھڑا کرنے کی ضرورت نہیں ، ہاں جو ضروری ہو ، اس پر بے تکان بولنے سے پہلے دماغ میں سوچ لیں کہ اب مسئلے پر مجھے میاں سے بات کرنی ہے ، کیا کہنا ہے ؟؟ الفاظ بھی سوچ لیں ، پھر ان سے بات کر لیں ۔ کوشش پوری کریں کہ سسرال کو زیادہ ڈسکس نہ کریں ۔ جیسے آپ کو آپ کے ماں باپ بہن بھائی عزیز ہیں ، شوہر کو اس کے پیارے عزیز ہیں ۔
سسرال کو لے کر خواتین کو عموماً دو ہی مسائل ہوتے ہیں : پیسہ ادھر لٹاتے ہیں یا محبتیں وہاں لٹاتے ہیں ۔ اپنے آپ کو یہ سمجھائیں کہ رزق اللہ کی دین ہے ، وہ انہی لوگوں کے نصیب کا اللہ نے میرے شوہر کو دیا ہوگا ۔ اگر آپ اس بات پر جھگڑیں گی ، دے گا تو وہ پھر بھی لیکن آپ کو پتہ نہیں لگنے دے گا ۔ سسرال میں بھی بری مشہور اور شوہر کے دل سے عزت بھی گئی ۔ حالانکہ جو آپ کے نصیب کا ہے وہ تو اللہ آپ کو دو پہاڑوں کے درمیان سے بھی عطا کر دیں گے ، پھر جھگڑا کاہے کا ؟؟ اور رہی بات محبتوں کی ۔۔۔۔۔ یاد رکھیں اگر شوہر کے دل میں جگہ بنانی ہے تو اسے اس کے پیاروں سے محبت کرنے پر نہ ٹوکیں ۔ محبت بھی اللہ ہی دل میں ڈالتے ہیں ۔ آپ کے زور زبردستی سے تو آپ اپنا رہا سہا مقام بھی کھو دیں گی ۔ ہاں شوہر سے ہر طریقے سے محبت کا اظہار کرتی رہیں تو وہ سب پلٹ کر واپس آئے گا ۔
اسی طرح ایک ہی بات کی بار بار تکرار بھی مناسب نہیں ۔ نہ ہی کئی سال پہلے کی باتوں کا بار بار تذکرہ کیا جائے ۔ میں یہ نہیں کہتی کہ اپنے احساسات اور جذبات کا اظہار ہی نہ کریں لیکن میرا کہنا یہ ہے کہ زیادہ چیزوں کو قبول کر لیں ، کچھ باتوں پر سٹینڈ لیں جو واقعی اس قابل ہوں ۔ الفاظ بھی مناسب ہوں ، لہجہ بھی بےعزتی کرنے والا نہ ہو ، اور دونوں اس بات کو ڈسکس کر لیں ۔ شوہر کا آپ کی بات سے متفق ہونا ضروری نہیں لیکن آپ کہہ دیجیے کیونکہ کہے بغیر دل کا حال صرف اللہ ہی جانتے ہیں ۔ شوہر کے مزاج کی وجہ سے اگر بات کرنا مشکل لگے تو مختصر مگر جامع الفاظ میں بات لکھ کر کہہ دیجیے ۔ ای میل یا ٹیکسٹ بھی کیا جا سکتا ہے ۔
ہر ہر بات اپنے گھر والوں تک فوری پہنچانے کی ضرورت نہیں ، ہاں اگر یہ لگے کہ حالات ہاتھ سے نکلتے جا رہے ہیں تو ایسے میں اپنے بڑوں کو ساتھ شامل کیجیے ۔ ان کی دعا بعض اوقات وہ کرشمے کرتی ہے جو ہماری ہر کوشش مل کر نہیں کر پاتی ۔
ایک بہت اہم بات : فیس بک ، یوٹیوب پر دیکھ دیکھ کر ، یا خواتین کے بتانے پر یہ فیصلہ نہ کر لیں کہ فلاں کا شوہر بہت اچھا ہے ، اس کو گھماتا پھراتا ہے ، مہنگے تحائف لے کر دیتا ہے ۔ اس کے گھر کی پریشانیاں آپ کو نہیں معلوم ۔ اپنے شوہر کا دوسروں کے شوہر کے ساتھ موازنہ کر کے اپنی اور شوہر کی زندگی مشکل نہ بنائیں ۔ عین ممکن ہے کہ اس کا شوہر گھر میں کام میں کوئی مدد نہ کرتا ہو ، اس کو میکے والوں سے نہ ملنے دیتا ہو ، چھوٹی چھوٹی بات پر بےعزتی کر دیتا ہو لیکن آپ سے یہ سب باتیں مخفی ہوں ۔ نہ تو خود موازنہ کریں اور نہ شوہر کو ایسی کوئی بات جتائیں ۔
اس کے علاوہ یہ کہ کھلے دل سے صدقہ کیا کریں ، دعاؤں کی قبولیت کے اوقات میں زیادہ سے زیادہ دعائیں کریں ، اور چونکہ میاں بیوی کے درمیان جھگڑا کروانا شیطان کا پسندیدہ کام ہے تو شیطان کو بھگانے کے لیے سورۃ البقرۃ کی تلاوت کو روٹین بنالیں کیونکہ حدیث میں آتا ہے جس گھر میں سورۃ البقرۃ پڑھی جائے وہاں سے شیطان بھاگ جاتا ہے ۔
میری دعا ہے کہ ہر گھر میں میاں بیوی کے دل میں ایک دوسرے کے لیے اتنی محبت اور عزت ہو اور یہ تعلق اس قدر مضبوط ہو کہ شیطان کی ہر ضرب خالی جائے ۔ آمین !!
نیر تاباں
